8月時在樂桃訂到了超便宜的機票，剛好可以和友人一起去關西賞楓！
是次旅行是大人和姐夫先出發，我就晚點到。出發前才想起忘了帶usb插頭，急急在機場買了一個。過關時見到大師兄家樂，真人都好nice呢！在飛機上隔壁坐位坐了個很沒禮貌的說國語的女生，以為自己會說一點日語就很厲害…對空姐態度不好之餘連多次撞到我都沒有半句對不起(怒)，睡覺時有半個頭都放到我那邊檯上了但其實你男友在另一邊啊你個頭死過去個邊啦(怒)。第一次點了樂桃的餐點，因為沒有吃早餐而且下機後有一段時間才到酒店，點了個芒果炒飯，樂桃會以餐點中的熱量對貧窮地區的兒童作點捐款。味道還好，吃不出有芒果味。落機過關也很順利。本身有過幾次經驗就是上網卡不能即時使用，今次也不例外，完全無法使用，只能靠機場的wifi通知姐夫已落機，但其實我連去酒店的路都不知道(汗)。先去買JR widepass，網上預約平500yen但我忘了印出來，好在手機有電郵，都成功買到。之後坐新幹線去新大阪再轉去梅田，其實呢個地方我成日迷路，因為JR是沒有梅田站，只有大阪站，但其實佢地係同一個地方來的，結果就成日混淆，而且出口又多人又亂，行錯個方向絕對可以搞足你半日，出口附近又阪神百貨又阪急百貨，睇錯左就大獲。結果我當然係無wifi用又唔識路，就去最有用的information center求救啦。識英文既靚女姐姐點左條唔洗點行地面既路比我，但係超級路痴既我去到地下街都係不停迷路再迷路，地下街入面既指示牌少得可憐，完全唔知自己行左去邊QQ好難得搵到個出口仲要上樓梯(事後發現其實如果行地面的話是完全不用行樓梯的)orz總之5分鐘的路我用左差不多成個鐘先返到酒店，check in左先有wifi用，先可以問到wifi card個seller(原來要裝個認証先用到，頂)。搵埋等左我成個鐘有多時姐夫，我地就去左地下街食飯，揀左個炸豬扒飯店因為可以無限添飯，我個餐仲有炸蝦架~好好味，又唔係好貴！食飽飽本身想去donki但多人到喊，都係決定早d返酒店休息下！
第二日一早起身我同姐夫就去京都東福寺，由於係星期六，一出站就好多人，我地係沿路食左個幾好味的栗子紅米饅頭，行左十分鐘左右就到喇！基本上人頭湧湧就一定的了，但大家都算有秩序，只是紅葉尚未完全轉色，大概6成左右吧！不過還是有幾個景點特別多人拍照，有一點擠就是了。東福寺外其實也有大大少少不同的建築物，我們參觀了隔壁的東福寺方丈八相之庭園，雖然比較小但是也不錯。有時間的話其實可以在裡面坐一會呢。說說天氣，比香港凍是一定的了，不過也不是很冷，尤其是太陽出來後再加上我們不停活動，基本上不用穿外套也可以，反而是晚上的話就會比較大風，有點冷的感覺。參觀完通天橋和庭色後，姐夫說要買東西，就真的在本來十分鐘到車站的路程逛了差不多一個小時有多(就真的是買了很多東西)！我也買了好吃的橘子，因為大叔很熱心的請我們吃，所以不好意思就買了喇~試吃那些山椒魚仔，很咸，如果日日咁食應該會好高血壓(毆)下午我就先回酒店休息一下，順便差電，因為約了日本朋友交收晚上看SUKEKIYO的門票。
今次是第一次在位於本町的御堂會所參戰，因為秋天的關係其實4點左右已經開始天黑，去到會場門外有一班為數不少的人都穿著全黑的服裝在排隊，上面則是很強勁的音漏。等到日本朋友交票給我，之後我就去排隊買GOODS(其實本身都無咩想買，但見有限定CD就排啦)同埋因為好肚餓，附近又無便利店又無熱食，好在拜託大人買了最愛關東煮解決呢個問題！LIVE REPORT就唔係度寫喇因為兒童不宜(毆)完場後約埋姐夫我地去返難波食OKONOMIYAKI，但我都係覺得食開個間風月好食D…然後姐夫話唔夠飽，仲買多左個咖哩飯返去食(驚)。
第三日我同姐夫出發去基佬城(姬路城)，原來姐夫未坐過新幹線！本身佢好想食車站便當但因為好趕的關係我只係比佢買左飯團(毆)而我個個半熟蛋飯團真係好味到不得了呀！一轉眼我地已經落車去到姬路，姐夫講左十幾萬次好想去但之前幾年都係裝潢架！去到因為人生路不熟我地就去左tourist center，點知就比我發現有得免費借用單車可以圍住個城外公園玩，咁好玩梗係要玩啦！首先由車站行8分鐘左右路去到地下有個單車轉用停車場，入面有個十分惡死既大媽(我去日本咁多次都未見過有大媽好似香港既大媽咁惡死)見我地兩個蠢蠢地就不停大叫「唔係咁呀唔係咁呀」但又唔講係要點…之後佢好勞氣地行過黎教我地…然後我地就推住架單車上返地面啦。但架車對我來說又太高，之後姐夫幫我set返個坐位低少少就好好多，但都有d難控制，所以都唔敢係馬路度踩，去到城門外多人的地方就更加啦。
話說，我其實對姬路城完全無idea，因為我對所有城都麻麻(去過的有熊本城同名古屋城)，但想不到！城外風景已經令我覺得好靚！真係有種不枉此行既感覺！因為護城河十分乾淨，又藍天白雲，仲有楊柳飄飄，真係風光如畫呀！入去公園泊好架單車先！城下公園主要係櫻花梅花，所以呢家未有花就無咩好睇，我地就排隊入內，如果要上天守閣要等兩個鐘囉！我地就只係係入面遊左下花園再參觀下某部份建築都已經影左好多相…之後因為想去隔離既好古園，我地就決定先踩單車係外圍兜左個圈先。外面其實感覺不太像日本反而有點像外國，尤其是美術附近的一段路鐘了金黃的銀杏樹，加上歐化的建築，真的完全不像在日本啊！不過之後我因為煞唔切車成個向右仆左落地下，右手手臂內側撞落石膊，當時是痛到起不到身，只可以等後來的姐夫扶起我…之後都是勉強支撐到下一個目的地，好古園。
一去到好古園第一件事做的是…去廁所睇下自己仆成點！因為著左長袖衫同絲襪的關係從外在完全看不到傷勢，點知一睇，已經瘀曬，好在無只係擦傷無流血，唯有忍痛繼續遊花園。好古園其實都係古典庭園，主要分左幾個部份可以欣賞唔同時節既花。入面有個餐廳茶座不過當然係爆曬啦，咁我都無咩心機所以就去行下影下。其實園內比想像中大，也有不同部份的特色。正當我影得興起，姐夫話有隻白鳥(唔知係鷺定係咩)企定定係度，我又去拍佢啦~真係好開心有咁既機遇！其實當時手臂已經係痛到有少少舉唔起，真係張張都有血有淚(毆)。影完好滿意的相後就再返返去姬路城門口附近的商店街，因為都有D肚餓了。食左個好味的士多啤梨軟雪糕，正呀。之後去還車，個大媽仍然好惡…放好車，我決定返酒店附近去睇下有冇得睇醫生，姐夫就去宇治。
返到梅田見到有間大藥房有醫生，剛好有個會說中文的職員我就跟他說我的狀況，之前趺倒痛都沒有哭，跟他說著說著就哭了起來QQ不過最後他幫我問過醫生(?)都說沒辦法，只能敷冰先消腫。回酒店後大概敷了一個小時後就要外出，由於瘀傷位置很熱的關係我給它貼了退熱貼，事後發現原來都有少少用(笑)好在那晚都只是坐著看sukekiyo，題外話是，不知是太累還是其他，兩晚的演出中我都有少少訓著左(毆)。完場約左日本朋友的朋友交飛，想不到偶遇之前在台灣一起看diru的keiko san！之後同大人去吃大阪之王將，久違了的擔擔麵啊好吃！回家繼續敷了一晚冰。
第四日是最行程緊密的，因為怕會下雨所以將行程改改先去岡山再去倉敷。今次也是坐新幹線，話說，其實雖然個pass寫可以坐東海道新幹線，但實在太多唔同既車我地都唔知係邊種，究竟係hikari，kotama，nozomi定sakura…總之最後我地都係是但坐，又唔知點解車長好似無咩check飛，不過都係建議要睇清楚先好坐(詳情後講)。今次姐夫有買到ekibento，我就食三文治不過明明叫chicken但入面係煙三文魚…
到左岡山，都係跟住指示就去找後樂園，呢日都多人呢，跟住人地我地去左坐電車，都係第一次係日本坐路面電車！大概5分鐘左右就到左後樂園附近，仲要行多10分鐘先到。不過天氣好好又有陽光空氣又清新，已經好開心啦。其實後樂園都係我今次旅行既重點，因為想去好多年架喇，但一直因為車費太貴又太遠，呢家出左新既wide pass先可以坐新幹線，一個鐘多少少就到，而且價錢超值，基本上你坐一次來回已值回票價，加上呢家yen平，所以今次唔去等幾時呀！一入到去後樂園，其實目標只有一個——就係行(笑)。後樂園聽個名就知勁，佢係日本三大名園之一，「園內主要建築物除了有諸候過去休憩的延養亭外，還有能樂舞台，池塘，假山，梅林，茶田等。同時，跟其他日式庭園不同, 後樂園比較罕見地有寬廣的草皮。園內整體的氛圍充分表現出瀨戶內海爽朗的風土氣候。」基本上，其實真係好似去左個有園景既耕地咁，另外，有好多日本人影結婚相，著住白無垢既新娘子好靚呢！仲有就係池塘入面好多又金又白又大條既錦鯉，條條都有我成條手臂咁長！行左個圈(都有成個鐘)我地就去茶屋坐下食左個甜品，之後就去對面行埋岡山城。岡山城屬於比較小的城，只有6層，入面都有些有趣的地方，例如可以預約試下做古代既公主，又有得扮城主影下相，都幾得意。我地仲試左白桃味既軟雪糕，入面竟然係有粒粒果肉架！勁好味，如果唔係凍又驚肚痛真係想食多兩杯(毆)。之後行多陣我地就返返去坐車出發去倉敷。
去到倉敷，第一件事就係去我最鐘意既tourist center啦！不過個小姐好似未訓醒，心情仲差過我，所以咩都問唔到走左。之後行左大概都有15分鐘先到美觀地區，姐夫第一件事就係要食！(因為行左成日都只係食左雪糕咁大把)食左個好大串既炸魚蛋，有好多枝豆係入面！主要美觀地區係有一堆白色牆身黑色瓦礫既屋仔圍繞有條河，咁河邊又有紅葉同垂柳，真係望下都覺得靚架！剛好又比我地見到有一對覓食天鵝，又係謀殺相機既時候！真係好感謝天時地利人和，可以影到好靚的相！本身可以預約坐船遊覽但我地太遲所以就無坐了。一路行主要既精品都係圍繞住牛仔布同玻璃，仲有其他手作野。我地又食左薑蜂蜜牛奶雪糕，但我就覺得麻麻地因為無咩特別味。姐夫仲食左個藍色波子汽水味的雪糕同藍色既鮮肉包。之後都係行行企企影下相，因為都真係行左成大半日，跟住我地就坐新幹線返歸，姐夫就去返大阪，我就去京都，點知，原來個pass唔可以坐新幹線去京都，就係咁比人罰左1400yen(哭)。
點解係都要去京都呢？因為要去二条城(以下打二條城方便些)睇一個金魚藝術裝置。本身應該好多好多年前係六本木有睇過一次不過個時唔識佢，上年得知佢有係二條城設展不過又去唔到，今次都係無啦啦見到又有開展，但上網買唔到優先飛，都博一博去買即日飛，同埋最正係佢夜晚5點後先開，咁日頭仲有時間可以行下先，加上我去咁多次京都都未去過二條城，所以加加埋埋佢絕對係今次一個重點既bonus！話說落左車都仲要轉地鐵，其實個日係佢地連休既最終人，成個車站多人到好似羅湖咁，本地人同旅客都多到喊，所以我係唔會去坐巴士架因為一定塞到嘔！坐地鐵好快就到，一出就係二條城門口，好在都唔多人，好順利就買到飛入去~不過個時都開始覺得凍，一來無咩食野，二來真係凍，又係露天地方，但無落雨已經好感謝啦！展覽雖然話係二條城入面但其實只係外圍個花園，實質係無入過城既~但有經驗係二條城花園大到不得了，試過係外面行，行極都唔完真係行左十幾分鐘都只係行左一半…anyways個展覽主要係有3大部份，簡單來說以金魚做主角再配合唔同的燈光同投影營造出獨特的氣氛，而且大部份展品都是很大堆頭很有氣勢的，可以說是簡單又漂亮。另外大會今次特別邀請了一位舞伎來表演，剛好時間上很接近，於是就睇埋演出。主要是扇子舞，舞者穿著和服配合扇子做出多種充滿少女氣息的姿態，但重點是他是男生！連身為女生的我都自嘆不如呢，真的好可愛。演出後還有幸可以跟他合照，他比我還要高兩個頭左右，可是很親切呢！這也是我第一次在日本看這些演出，感覺很新鮮。之後場外還有有關金魚和季節的和服展，每件手工都很精細漂亮栩栩如生，這些文化能夠得以保存下來真是太好了。外面還有一些小酒攤，不過我有傷在身不能喝，先回京都車站，整天下來其實沒有吃過什麼但已差不多8點，還是先食個飯。選餐廳的方法就是不用排隊，然後見到有間和洋風的意粉屋，可以自選麵或烏冬，加上有3個小甜品，和洋的也有，價錢也算合理，就入去試了，也真的很不錯，很滿足的一餐。之後回酒店就已經要收拾行李準備回港了。
第五日，因為我預先約左去剪頭髮所以8點就check out了。說來這也是我第一次在日本理髮！8點的車站就是人頭湧湧迫都迫唔到上車個種…決定坐到去難波放好個行李入locker先。準時9點去到salon，先前在網上預約了指定的髮型師是masayuki哥仔，重點是他來自京都(笑)。然後他有在外國留學的經驗所以會說英文性格也很開朗所以整個過程就是很愉快啊(心)話題其實以國際交流為主，原來哥仔下年已擬定要去法國，好羨慕他呢！超感謝他幫我把頭髮弄得很柔順，最後也邀請了他一起合照留念(笑)。但哥仔說他不認識diru啊怎麼可以明明是京都人(毆)。然後哥仔比我大3年，但當我跟他說我也是30代時他表示很驚訝(笑)。剪完髮就去同姐夫會合，之後仲同姐夫去左jins配眼鏡，話說服務員姐姐原來是來自兵庫的，聽到我們又去岡山又去倉敷她表示很少聽到有人會去這些地方，所以也想找時間去看看。姐姐很親切的幫姐夫配了個眼鏡，也只要等30分鐘就可以取貨，真的快靚正！期間我去左藥房買野，現在好多熱門貨都係十枝一pack專比外國人買(其實都只係寫左中文)，好恐怖囉…跟住帶姐夫去食關西最好味之甲賀流章魚小丸子，真係好好味呀好味到說不出聲！然後在美國村兜了幾個圈，thankyou mart同3日月都好多又靚又平既精品令人目不瑕給。之後姐夫要返去執行李，我就繼續留在難波，食左個好好味的花型gelato，老闆娘也是很親切的！雖然天氣好凍呀食完都好凍！之後已經唔想行我就去左唱一人卡拉，好耐無在日本唱k了，可以唱到新歌很感動(毆)。之後都無興趣再行了(重點是錢已花光光)所以提早出發去機場，因為去到機場仲要執行李，由於peach對行李管很嚴所以都花了點時間去執，最後當然是安全過關！過關前好想買桃味的酒不過都係忍住唔飲得…回程班機也很準時，安全到埗！
整體來說今次算是最多麻煩事的一次，也是試得最多第一次的一次，還有去了很多想去的地方很感動，下次去旅行會再加倍注意安全！特別感謝姐夫同大人的幫忙，尤其姐夫真的十分有耐性在每個景點都等我慢慢影，在我受傷後又好照顧我，真的很感謝！希望今次旅行你都覺得開心啦！題外話是，酒店是在二樓的和式榻榻米房，我晚晚都聽到樓下好嘈…究竟係咩聲呢。(完)
沒有留言:
張貼留言